“Ailə rifahı naminə qadınları maarifləndirək” layihəsinin açılış konfransı keçirilib

01 mart 2022-ci il tarixdə İsveçrə İnkişaf və Əməkdaşlıq Agentliyi tərəfindən maliyyələşdirilən Azərbaycan Mikromaliyyə Assosiasiyası və Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən icra olunan “Ailə rifahı naminə qadınları maarifləndirək” layihəsinin açılış konfransı olub.
Əvvəlcə qonaqlar xalqımızın ümummilli lideri Heydər Əliyevin Naxçıvan şəhərinin mərkəzində əzəmətlə ucalan abidəsi önünə gül dəstələri qoyub və Heydər Əliyev Muzeyində olublar. Muzeydə qonaqlara ulu öndərin xalqımıza həsr etdiyi mənalı ömür yolu və parlaq siyasi fəaliyyəti haqqında məlumat verilmişdir.
Sonra tədbir Naxçıvan Biznes Mərkəzində “Ailə rifahı naminə qadınları maarifləndirək” layihəsinin açılış konfransı ilə davam etmişdir. Muxtar respublikanın aid dövlət qurumlarının nümayəndələri və layihə iştirakçısı olan 9 nəfər qadının də iştirak etdiyi konfransı giriş sözü ilə açan Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova muxtar respublikada dövlət qadın siyasətinin uğurla həyata keçirildiyini diqqətə çatdırmış, müvafiq sahədə görülən işlər və əldə olunan uğurlar barəsində ətraflı bəhs etmişdir. Qeyd olunmuşdur ki, ölkəmizdə olduğu kimi Naxçıvan Muxtar Respublikasında həyata keçirilən uğurlu sosial-iqtisadi siyasət əhalinin həyat səviyyəsinin yüksəldilməsinə xidmət edir. Muxtar respublikada sosial siyasətin tərkib hissəsi olan dövlət qadın siyasəti də uğurla həyat keçirilir. Müvafiq sahəyə göstərilən diqqət və qayğının nəticəsində qadınların cəmiyyətdə mövqeləri möhkəmləndirilir, dövlət idarəçiliyində təmsilçiliyi və vəzifələrə irəli çəkilməsi təmin edilir. Onların bütün sahələrdə dayanıqlı inkişafı üçün tədbirlər görülür. Bu da muxtar respublika qadınlarının digər sahələrdə olduğu kimi iqtisadiyyatın və kənd təsərrüfatının aparıcı sahələrində öz bacarıqlarının ortaya qoyulmasına münbit şərait yaradır.